Maktab haqida

Xiva shahridagi Prezident maktabi — Xorazm viloyatining iqtidorli oʻquvchilari uchun davlat ixtisoslashtirilgan internat maktabi. Taʼlim toʻliq davlat byudjeti hisobidan olib boriladi.

Umumiy maʼlumot

Prezident maktablari Oʻzbekiston Respublikasi Prezidentining 2019-yil 20-fevraldagi PQ-4199-sonli qarori bilan tashkil etilgan. Maktab 5–11-sinflarda taʼlim beradi va internat shaklida ishlaydi: oʻquvchilar hafta davomida maktab hududida yashab, tahsil oladi.

Oʻquv jarayoni milliy standart va xalqaro dasturlarni birlashtiradi. Asosiy eʼtibor aniq va tabiiy fanlarga, shuningdek ingliz tiliga qaratilgan.

Bizning maqsadimiz

Iqtidorli yoshlarga oʻz salohiyatini roʻyobga chiqarish uchun sharoit yaratish: chuqur bilim, xalqaro darajadagi tayyorgarlik va mustaqil fikrlash koʻnikmasi. Bitiruvchilarimiz dunyoning kuchli universitetlariga kirishga tayyor boʻladi.

Maktab sharoitlari

• Toʻliq internat: yotoqxona va kunlik toʻrt mahal bepul ovqatlanish
• Oʻquv formasi va darsliklar davlat hisobidan
• Fizika, kimyo va biologiya laboratoriyalari — amaliy imtihonlar shu yerda oʻtkaziladi
• Robototexnika ustaxonasi va raqamli kutubxona
• Sport zali va toʻgaraklar
• Yuzni tanish terminallari orqali kunlik davomat nazorati

Xalqaro tan olinish

Prezident maktablari Cambridge, CIS (Council of International Schools), Cognia va Pearson-Edexcel kabi xalqaro taʼlim tashkilotlarining akkreditatsiyasidan oʻtgan va xalqaro maktab maqomiga ega.

Maktabimiz Pearson Edexcel va Cambridge xalqaro imtihonlarini oʻtkazish uchun rasmiy markaz hisoblanadi.

Eko-maktab

Maktabimiz UNICEF va Maktabgacha va maktab taʼlimi vazirligi qoʻllab-quvvatlaydigan EcoSchools Uzbekistan dasturida qatnashadi. Oʻquvchilarimiz Young Climate Champions tashabbusining ishtirokchilari.